شاهد اسرار يارا راجح شهوان
اخر ٣ سنين من عمري انعزلت عن الناس و حياة المدينه الصاخبه و اتجهت للصحرا بيتي وعشقي و حياتي ، ممكن زهق من مشاكل الناس و الدراما التي لا تنتهي اللي كلها شبه بعضها باختلاف الشخصيات والاسامي ، او ممكن ملل من عيشتي ومحتاجه تغيير ، او ممكن لايجاد سبب حقيقي لفكرة الوجود غير اللي اقنعونا بيها وهي فكرة التكاثر وتبقى مصيبه لنكون نازلين الدنيا عشان نتكاثر ونرعرع مش من حلاوتنا اوي ده كلنا عاهات متنقله و بنطلعها على بعض و بندور في حياتنا كلها نعالجها ازاي او نئذي بيها اللي حوالينا ازاي سواء عن ادراك او عشان مغيبين او مشغولين بالعيشه و اللي عايشينها و السحله اللي بنعيشها عشان نعرف نعيش
على مدار عمري كله اختلفت الاسئله الوجوديه باختلاف النضج و الخبرات مش بكبر السن وصغره ، زمان السؤال كان سؤال الضحيه اشمعنا انا !!!! اتحول لاندهاش و استغراب هو ايه اللي بيحصل ده !!! لغاية ما وصلت هو ليه اساساً بيحصل !!!
وفي يوم واحن ماشيين بالعربيه بنلعب عالديونز في الصحرا كان الجو بديع و السما خطيره و السحاب عامل زي قطن مشكّل على هيئة شخصيات مرسومه بتحكي حدوته و قصه و روايه من صنع خيالي و شويه و لقيت خيال السحاب مع ظهور نور الشمس و غيابها عامل انعكاس عالديونز و كأن السما انطبقت عالارض و الاتنين اصبحوا واحد و كأني طايره في السحاب ولكني عالارض ، السما و الارض اصبحوا واحد و انا ذايبه مابينهم وكأن الكون كله جوايا ، احساس لا يمكن يتوصف بالكلام لكن لازم يتعاش زي ماهو بكل تفاصيله و انا حاضره لكل لحظه فيه و ساعتها افتكرت اقوال جلال الدين الرومي اللي كنت برددها و ماعشتهاش زي مايكون كنت بنادي عاللحظه دي بقالي كثير عشان اعيشها
" كل شىء في الكون موجود بداخلك ، فاطلب اياً ما اردت من نفسك "
" وتحسب انك جرم صغير …. و انطوى فيك العالم الاكبر"
"انت لست قطره في محيط ….. انت المحيط العظيم في قطره "
الخلوه في الطبيعه سحر ماليان اجابات