الفضاء خارج كوكب الارض
سلام عليكم
هنفرض ان بشكل او بأخر قدر انسان انه يطلع الفضاء
و وقع في الفراغ الكبير دا
تفتكر ايه هيحصل؟
الكون عبارة عن فضاء واسع جدا
مليان بالكواكب والنجوم وأقمار
ونيازك وكويكبات
وغيرهم كتير من الاجسام الكونية
و وسط الاجسام الكونية الكتير دي
موجود كوكبنا كوكب الأرض
ولأن الكون كبير جدا
اذا فيه فراغات كبيرة جدا بين الاجسام الكونية وبعضها
و الفراغ دا هو الفضاء
من قديم الازل
الفلاسفة والعلماء كان ديما بصين للسما
الكون والاجسام اللي موجودة فيه
كانت ديما بتشغل تفكيرهم
ومن وقتها لحد دلوقتي
فلاسفة كتير حاولوا يفسروا الظواهر الكونية
اللي بيقدروا يشوفوها من علي الأرض
والعلماء شغاليين أبحاث وتجارب
وبيخترعوا أجهزة و مركبات فضائية
كل دا في سبيل استكشاف العالم المجهول
اللي موجود فوقنا دا
والموضوع مسيطر علي تفكيرهم
لدرجة ان سنة 1967
في جامعة CAMBRIDGE
طالبة اكتشفت موجات راديو جاية من السما
تجاه الأرض
أصوات غريبة تشبه النبضات
وبعد ما أتأكدو ان الأصوات دي جاية فعلا من الفضاء
عملوا مؤتمر بيعلنوا فيه انهم اكتشفوا فضائيين
وانهم في الغالب بيحاولوا يتوصلوا معانا
بس للأسف
طلع الكلام دا مش صحيح
ودي كانت موجات ناتجة عن نجوم معينة
بتقدر انها تصدر الأصوات دي
كل الهوس دا
عشان فضولهم في اكتشاف الكون
اللي بيقدروا عمره بحوالي تقريبا 93مليار سنة ضوئية
والسنة الضوئية هي
وحدة قياس المسافات الكبيرة جدا في الفضاء
يعني انت محتاج توصل لسرعة الضوء اللي هي 300.000كم في الثانية
وهتسافر بقي لمدة 93مليار سنة ويمكن أكتر كمان
عشان توصل لمركز الكون
يعني لا أجدادنا ولا احنا
ولا أحفاد أحفاد أحفاد أحفدنا هيروحوا في حته
بس عشان العلماء يسهلوا دراسة الظواهر والاجسام الفضائية
ويقدروا يكتشفوا الكون بطريقة أسهل
قرروا انهم يطلعوا الفضاء بنفسهم
وسنة 1961
تم اطلاق اول مركبة فضائية او مكوك فضائي
وعلي متنها رائد فضاء وهو "يوري جاجارين"
من قبل الاتحاد السوفيتي اللي هي روسيا يعني حاليا
وبقي أول انسان يطلع للفضاء
طلع لحد ارتفاع 169كيلومتر
ومن وقتها لحد دلوقتي
طلع أكتر من ألف شخص للفضاء
بس الموضوع مش سهل خالص
ومليان بالمخاطر
ليه بقي ؟
الانسان العادي كدا لو طلع الفضاء
هيواجه شوية مشاكل
جو الفضاء مش زي جو الكوكب بتاعنا
هو أصلا مفيش جو خالص
مفيش غلاف جوي زي الغلاف اللي حوالين كوكبنا
اللي بيحافظ علي وجود جو ملائم ان الانسان يعيش فيه
ولان مفيش جو
فمفيش أكسجين أساسا نتنفسه
وكمان مفيش ضغط جويي
ماقولنا أًن مفيش جو أساسا مفيش جزيئات هوا تعمل ضغط جوي
فطبيعي يكون مفيش ضغط
ولما بينعدم الضغط الجوي
دا بيخلي السوائل اللي زي الماية مثلا تغلي وتتحول لبخار
ولأن الماية بتكون 60ف المية من جسم الانسان الماية دي بتبدأ تغلي
دا غير ان دم الانسان أصلا سائل فبيغلي وبيتحول لبخار برضو
فا الانسان العادي مش هيكمل دقيقتين وهيبدأ يتجمد ويتخنق
فطبعا لو طلعت الفضاء بلاش تخرج من المركبة الفضائية
بس في بدلة فضائية
عندها القدرة انها تحافظ علي جو مناسب للأنسان
انه يعيش في الفضاء وهو لابسها
بس المشكلة ان مش بس دي المخاطر اللي بتواجه الانسان في الفضاء
في مخاطر كتير تانية ممكن تواجهه
زي مثلا موضوع انعدام الجاذبية
احنا موجودين علي كوكب الأرض وبنتحرك بشكل طبيعي
لان في جاذبية بتشدنا تثبتنا علي الأرض
حتي جرب تنط كدا هتلاقي نفسك بتتشد تاني للأرض
مش بتخرج للفضاء من النطه
اما بقي الفضاء فمفهوش جاذبية أصلا
يعني انت حرفيا هتكون عايم في الفراغ
المفروض أي جسم عشان يتحرك لازم يدفع حاجة ما بقدر ما من القوة
انك تمشي مثلا ف انت بتدفع الأرض برجليك عشان تتحرك
او السمك في الماية بيدفع جزيئات الماية عشان يعوم
الطيور في الهوا بتدفع جزيئات الهوا عشان تطير
في الفضاء بقي مفيش حاجة خالص
لا أرض ولا مايه ولاهوا
يعني مهما حركت ايدك ورجليك هتفضل ثابت مكانك
ومش بس دا الأثر السلبي لأنعدام الجاذبية
لا
دا كمان اجسامنا من جوا أصلا متأثره بالجاذبية
يعني أعضاء أجسامنا انعدام الجاذبية بيأثر عليها بالسلب
الكتير من رواد الفضاء لما بيطلعو للفضاء
بيعانوا من صداع وغثيان وقيء
ودا بسبب ان الاذن الداخلية للأنسان
مش بتكون عارفة تحافظ علي توازن الانسان
ايوه الاذن الداخلية للأنسان بتقدر تحدد الاتجاهات
بسبب تأثرها بالجاذبية
في الفضاء مفيش جاذبية فدا بيكون أول أثر سلبي هيحس بيه الانسان
اما بعد فترة
عضلات الجسم بتبدأ انها تسترخي وتفقد قوتها
لأن برضو الجاذبية بتخلينا نبذل مجهود عشان نتحرك
فجسمنا بيكون عضلات
تدينا قوة اننا نقدر نتحرك رغم تأثير الجاذبية علينا
في الفضاء بقي مفيش جاذبية أصلا
يبقي لازمتها ايه العضلات
فالجسم بيبدأ يفقدهم
غير دا كله بقي في أصلا مخاطر خارجية
حوالين كوكب الأرض
موجود حاجة اسمها القمامة المدارية
ايوه دا الاسم اللي بيطلق عليها من علماء الفضاء
ايه بقي القمامة المدارية دي ؟
بوص في أقمار صناعية كتير بتلف حوالين كوكب الأرض
كتير جدا يعني معاها أجسام تانية برضو تايه في الفضاء بتيجي تلف حوالين الكوكب بتاعنا
الوضع فوق زحمة جدا يعني
المهم ان من سنة 1957
السنة
اللي تم فيها أطلاق اول قمر صناعي من الاتحاد السوفيتي
واتسمي بالقمر الصناعي رقم واحد
ايو دا اسمه بديهي طبعا يعني
المهم يعني من بعدها و كل الدول بقي بالتدريج
عماله تطلع في أقمار صناعية تلف حوالين الكوكب
طبعا الأقمار دي بيتلف منها أجزاء
او أصلا القمر بالكامل بيتلف ويبوظ بعد فترة
ما أي حاجة ليها عمر
بس الحاجات التالفة دي بقي
كتير منها بيفضل يلف حوالين الأرض زي ماهو كدا
عمال يلف يلف
وخد من دا كتير بقي
لحد ما الوضع بقي مزبلة
وسموها القمامة المدارية
القمامة دي طبعا بتهدد رواد الفضاء انها ممكن تخبط فيهم
لانها بتكون ماشية بسرعة كبيرة جدا
والخبطة منها مميتة
او علي أقل تقدير هتتلف البدلة اللي ذكرنا أهميتها
وفي الشظاية الكونية
ودي برضو بتكون اجسام صغيرة جدا
بس سرعتها عاليه جدا
لو خبطت في رائد الفضاء فهي عبارة عن رصاصة هتبوظ البدلة
وطبعا انت عارف البدلة مهمه ليه لسا شارحين دا ف اول الفيديو
و أي خلل فيها هيسبب اضرار ممكن تأدي للموت
ف تمام هنخلي بالنا من القمامة المدارية
والشظاية الكونية
بس هو أصلا ازاي هنتحرك في الفضاء؟
رواد الفضاء بيكونوا مربوطين بحبال
متوصلة بالمركبة الفضائية
عشان بعد ما ينطوا في الفضاء
يقدروا يسحبو نفسهم للمركبة تاني
واصلا بدلة الفضاء بتكون مزودة بمضخات هوا
عشان تدفع رائد الفضاء في الاتجاه اللي عايز يروحه
تمام احنا حاليا جهزنا كل حاجة
وهنخلي بالنا من المخاطر اللي قولنا عليها
وهنسافر في الفضاء براحتنا
المشكلة الجاية بقي ان الكون هو فضاء واسع جدا
ومليان أجسام كتير جدا
في مخاطر كتير ان جسم منهم يخبط فينا
او جاذبية نجم او كوكب تكون قوية
لدرجة انها تشدنا وتسحبنا نحيته
ونفضل نلف حواليه زي القمامة المدارية
اللي عماله تلف حوالين كوكبنا
او نقابل مقبرة نجم
اللي معروفة بالثقب الأسود
ودي جاذبيتها عالية جدا
لدرجة انها بتجذب الضوء ومش بيقدر يهرب منها
لو قربنا منها فخلاص مفيش هروب
هنفضل نلف حواليها بسرعة عالية جدا لدرجة ان اجسامنا هتتحول لذرات
ولسا في كتير من المخاطر اللي منعرفش عنها حاجة
لأن أصلا كل الاكتشافات دي والتطور العلمي دا
فهو 5في المية بس من اللي نعرفه عن الكون
يعني احنا منعرفش حاجة عن الفضاء الخارجي دا
ودا اللي بيدفع العلماء انهم يدورا أكتر
عشان يرضو غريزة الاستكشاف البشرية
لدرجة ان تم بناء محطة فضاء كاملة بتدور حوالين الأرض
بدأ اطلاقها سنة 1998
وصلت تكلفتها ل100مليار دولار
ودي بتكون أكتر تالت حاجة منورة في السما بليل
وتقدر تشوفها عادي لما تعدي من فوقك
كل دا عشان فضول العلماء في اسكتشاف الفضاء
ومتابعة مهمات القمر والمريخ
والبحث بطريقة أسهل في أعماق الكون
