كيفية التعامل مع الاطفال الصغار ..

الاطفال .. تربة خصبة جدا جدا لأي فكرة أو تصرف أو ميول أخلاقي أو فكري أو حتى ديني .. هيتزرع فيهم .. 

بس الفكرة ..! 

احنا لازم نسأل نفسنا سؤالين مهمين جدا .. عشان نقدر نوصل للنتيحة السامية .. اللي احنا بنحلم بالوصول ليها .. و هي الارتقاء لأطفالنا .. للمكانة اللي نفخر فيها بيهم ..

السؤال الاول ..

إزاي نقدر نزرع في الطفل الصغير .. الفكرة او الميول .. اللي احنا بنتمنى اننا نشوف ابننا عليها ..؟؟!!

أحب أقولك .. اننا نقدر نعمل كده فعلا .. باتباع شوية خطوات صغيرة و بسيطة جدا .. 

بعد كده .. هنقدر بالفعل نشوف ابننا بالشكل اللي نتمناه و افضل …

الخطوة الأولى …

حضرتك كأب .. و حضرتك كأم .. لازم يكون فيه توافق كبير جدا جدا .. ما بينكم ..

يعني .. مينفعش تبقى تصرفاتكم متناقضة ..

بمعنى أكثر وضوحا .. مينفعش مثلا .. يكون الأب بيروح باستمرار للمسجد أو الكنيسة .. في حين أن الأم بعيدة كل البعد عن واجباتها المتعلقة بالدين ..

مينفعش مثلا .. يكون الأب بيشرب سجاير قدام ابنه علاطول .. و الأم من ناحية تانية  بتحذر ابنها من شرب السجاير ..

الخلاصة …

خليكوا متفقين في تصرفاتكم قصاد ابنكم .. و طبعا مع مراعاة الحرص على نوع التصرفات ديه .. اللي لازم تخضع قبل الظهور قصاد ابننا لمجموعة من المعايير و الأخلاقيات و الفلترة ….

الخطوة الثانية …

لازم تراقب طفلك باستمرار .. لازم تشوف ميوله .. تشوف تصرفاته و طريقة لعبه و كلامه .. 

طب تفتكروا .. إيه الفايدة من كل ده ..؟؟!

ببساطة شديدة …

أي طفل .. أيا كان ..!! بيتولد بميزة معينة .. بيتولد بفضول و شغف رهيب تجاه شيء معين .. 

مثلا .. 

الاطفال .. اللي بتحب القصص جدا .. بتفضلها عن الكرتون مثلا .. أو اللعب ..

أحب أقولك .. انك لازم يكون عندك يقين و تأكد .. أن باهتمامك و مراعاتك المستمرة للهواية او الميول .. اللي عند ابنك .. 

زي انك مثلا تجيبله قصص مصورة .. يكبر شوية قصص للاطفال … يكبر اكتر تجيبله كتب و روايات ..

انت بكده .. ممكن جدا .. تتفاجيء في النهاية .. بأن ابنك ده بعد سنين قليلة .. بقى كاتب كبير .. كاتب ليه محبينه و جمهوره …

و ماذا سيحدث .. لو لم نفعل ذلك ..؟؟!!

هقولك ..!!

ممكن بكده .. تكبت مواهب ابنك و ميوله .. 

طبعا ده بيكون في سبيل .. انك تخلق ليه خط سير مختلف .. من اختيارك انت .. من وجهة نظرك .. اللي لا تتوافق مع قدراته و ميوله .. و ده اكيد عشان يطلع على الشكل اللي انت بتتمنى انك تشوفه عليه ..

طب برده إيه المشكلة في كده ..؟؟!

بعض الأطفال .. مش بتقدر تغير لونها .. أو تغير الميول و المهارات اللي عندها .. في سبيل استقبال مهارة جديدة .. غير متوفرة عندها اطلاقا .. 

الخلاصة …

اهتم بتنمية المهارات الحياتية ..، و الهوايات اللي بدأت تظهر على ابنك الصغير ..

اللي يختارها هو .. مش اللي انت تختارها ليه ..!

و بلاش تجبره على خط سير معين .. مش هيقدر يمشي فيه … من الأساس ..

طيب .. لو افترضنا .. أن حضراتكم نفذتوا الخطوة الأولى ..

هنعمل إيه تاني بعد كده …؟؟!!

هقولك ..!

السؤال الثاني …

ازاي اقدر احافظ على الفكر أو التصرف او الميول .. اللي زرعته في ابني .. بدون أي تكسير أو هدم للبناء الفكري .. اللي بنيته ..؟؟!!

أحب أقولك .. و للاسف الشديد ..!!

ان ممكن كل اللي انت عملته في الخطوة الأولى .. يضيع على الأرض .. و كأنه لم يكن .. لسبب واحد فقط .. إلا و هو … عدم المراقبة 

يعني إيه ..؟؟!! 

يعني لازم تراقب و تشوف ابنك .. ييتفرج على إيه .. بيقعد مع مين .. بيتكلم مع مين .. مين زمايله في أي مكان هو بيروح فيه ..

لان صدقني .. اي مشهد من فيلم او كلمة من شخص او فنان أو انفلونسر .. ممكن جدا تأثر على فكره .. و ميوله .. و خط سيره تماما ..

لان زي ما قلنا .. الطفل .. هو تربة خصبة جدا لاي فكر أو ميول .. هيتذرع فيها .. و للاسف التربة ديه مش بتقدر تميز بين الجيد و السيء ..

عشان كده .. أرجوك .. خلي بالك ..! كويس جدا .. و اختار بعناية .. الأشياء اللي هتسقي زرعتك …

                                                     سلام