10 نصائح لمشتريات رمضان 2023
10 نصائح لمشتريات رمضان 2023
1-من دلوقتي اشتري :
كل لما تيجي تشتري طلبات بيتك هاتي حاجة او حاجتين لرمضان المبارك، ياعني لو هتنزلي تجيبي طلبات الاسبوع زي المكرونة او الشعرية او الرز والسمنه
جيبي كل مره حاجة لرمضان، كيسين شعرية او مكرونه او كيلو رز او علبة سمنه ربع جوز مثلا او ربع سوداني مثلا او لو خضار زي البسله والسبانخ، كل لما تيجي تشتري حاجة من الخضار اشتري كيلو او اتنين كيلو من اي نوع لحد ماشهر الخير يجي بالسلامه يكون الخير في بيتك مليان.
2- حددي اولوياتك:
ياعني اكتبي ورقة باللي انتي عاوزه تخزنيه لرمضان من بقول وخضار ومكرونة وشعرية، شوفي ايه الاولوية بالنسبالك
وابدأي بيها وربنا يوسع علينا وعليكم.
3-كل مره شيلي كام معلقه:
كل اما تيجي تعصجي لحمة شيلي اربع معالق او خمسة في كيس خزين، مش هتحسوا بيها ومره على مره هتعمل طابخه تنفعك في حشو اي حاجة في رمضان، يوم ماتعملي بانيه شيلي قطعه او اتنين ومره على مره هتعملي واجبه ، وكل لما تعملي لحمة شيلي قطعه وحطيها في كيس مره علي مره هتعملي طابخه والكفتة برده تقدري تشيلي اربع او خمس معالق مثلا.
4-خليها يومين ويوم:
من الايام دي ابدأي خلي اغلب الايام قرديحي ،يومين قرديحي ويوم لحوم ،ده هيخلي الميزانية تخف شوية الفترة دي وبكده تحاولي تجيبي اي حاجة لشهر الخير.
5-متضغطيش جوزك:
كل حاجة هتعدي وبتعدي فمتقلقيش من بكره، احسبيها اه وفي نفس الوقت ارميها على الله،ومتضايقيش جوزك بسبب الفلوس عشان متعمليش مشاكل بينكم كل شوية، وعشان يكون عنده نفس يشتغل اصلا،ويدخل رمضان عليكم بالخير مش بالخناق والمشاكل !
6-الحاجة اللي بتشتريها خبيها:
اي حاجة بتشتريها لشهر الخير، متحطهاش تحت ايدك، واعتبريها مجتش، تناسيها على اد ماتقدري، واعملي زي كرتونه كده خبيها وحطي فيها الحاجة اللي بتجبيها ،واول يوم رمضان املي مطبخك بيها.
7-جهزي اللي ينفع تجهزيه:
ياعني لو جبتي كيلو رز وحاطه في دماغك ان هتعملي كفتة رز في رمضان، نقعيه ونشفيه واطحنيه وحطيه في الفريزر عشان يكون جاهز تستخدميه ،وماياخدش منك مجهود كبير، لو مثلا جبتي كرنب يبقى قطعيه واسلقيه وفرزيه، بسله جهزيها وفرزيها، طماطم عاوزه تتصلص صلصيها، وهكذا، اللي ينفع يتجهز جهزيه!
8-فرزي كميات متفاوته:
ياعني متخليش الاكل اللي بتفرزيه اد بعضه، ياعني لو هتفرزي 10 اكياس بسلة، خلي منهم 3مثلا كبار و3 حجم صغير على اد الاسرة و4 وسط، والكرنب هيكون بكميات متفاوتة، الصلصة، صلصة المحشي، والكفتة او اللحمة.
9-وفري الكماليات:
ياعني لو متعوده تجيبي حاجات للزينة كل سنه حاولي توفريها السنه دي،واستخدمي حاجات السنه اللي فاتت، كمان حاولي تفرحي ولادك على اد الموجود والفرحة بتبع من داخلنا مش من الحاجة اللي بنشتريها، فيه حاجات اهم بكتير جدا في ظل الظروف الاقتصاديه الصعبه اللي بنمر بيها!
10-متجلديش نفسك:
متقعديش تعذبي في نفسك بالتفكير، لان فعلا فعلا كله هيعدي، صعب سهل بيعدي، فمتعذبيش نفسك وتظلميها
لا يكلف الله نفسا الا ما آتاها، حاولي تكوني اهدى، وامش مع الطيار مش عكسه.
اتمنى اكون افدتك فعلا ولو بشئ صغير ...
