و لا الدنيا سهله و لا النجاح واقف يندهلك
الحياه فيها نوعين من الناس الناجحين: النوع الاول نجح بالصدفة او نقدر نقول اتمهدلو الطريق للنجاح ده فعرف ينجح بسهوله زي مثلا ان ابوه معاه فلوس فمتعبش في النجاح, النوع التاني عافر لغاية ما وصل للنجاح و طلع عينه و عين اهله عشان يوصل و بدأ من الصفر و يمكن كمان من تحت الصفر.
و تلاقي النوع الاول بينظر عليك و يقعد يتفلسف و يقولك عشان تبقي ناجح زيي لازم تعمل كذا و كذا فتتعقد و تحس انك فاشل و عمرك ما هتنجح , بس المشكلة هنا انك بتسمع للشخص الغلط هو متعبش اصلا في حياته عشان يديك دروس في الحياه عن النجاح فمتخليش حد يحبطك تو يقلل ثقتك في نفسك لمجرد انك شايف ان عنده حاجات مش عندك.
في ناس كتير فاكرين انهم لما ينجحو هيرتاحو في حياتهم و التعب هيقل بس بيلاقو ان العكس بيحصل و انهم بيتعبو اكتر قصاد النجاح ده خصوصا عشان يحافظو عليه زي الجملة الشهيره اللي كلنا عارفينها (اتعب دلوقت عشان ترتاح بعدين) و الحقيقة ان ده مش بيحصل , انت في كل مرحلة من حياتك هتكون فاكر ان التعب اللي بتتعبو دلوقت ده اكبر تعب ممكن تتعبو و قدام لما تكبر شويه هترتاح, زي لو في حد لسه في المدرسة هيفكر انه لو دخل كلية هيرتاح,في نفس الوقت الشخص اللي في كلية بيفكر انه لما يتخرج هيرتاح,و لما يتخرج هيفكر لو لقي شغل كويس هيرتاح ,و لما يشتغل هيقول لما اترقى هرتاح,بس في الواقع محدش مرتاح, لا اللي لسه بيدرس و لا اللي اتخرج و لا اللي بيشتغل و لا العاطل و لا الغني و لا الفقير.
ربنا خلقنا عشان نتعب,كلنا بندور علي الراحة و عارفين ان الراحة في الآخرة .
الافلام و السوشيال ميديا بقت تصدرلنا صوره ان الحياه سهله مفيهاش صعوبات بس مش بيورونا الجانب التاني للحقيقه و ان زي ما في حاجات سهله اكيد في قصادها حاجات صعبه.
نادر جدا لما تلاقي حد مبسوط و راضي عن حياته و بيشكر ربنا علي نعمه من غير ما يشتكي,لازم تكون عارف ان الحياه مش دايما ورديه.الناس بقت تشتكي و تصيح من اقل حاجه و ينسو النعم اللي مغرقاهم ,اه عندك مشاكل في الشغل بس في ناس مش لاقيه الشغل ده ,و انت مش لاقي شغل بس عندك عيله بتحبك و بتدعمك و عندك مكان تنام فيه في ناس كتير بتنام في الشوارع , و انتي العيال مطلعين عنيكي بس في ناس بتتمني طفل واحد , عندك امتحانات طول السنه لكن في ناس نفسهم يدرسو و يتعلمو بس مش عارفين .
خليك متأكد ان مفيش حد مرتاح في حياته بنسبه 100%.
