المسمار حسام عاشور لاعب النادي الاهلي السابق

قبل ما تذكر أرقامه القياسية والإعجازية  تقف على موهبته ودوره الفني الأول ومينفعش يكون سرد عبارة عن أرقام فقط دون أي فنيات أو كمليات كما لو كان لاعب محظوظ تواجد مع جيل ذهبي يتنفس بطولات ففاز معاهم وسجل أرقام وخلاص

لاااااااا انت بتتكلم على عمود خيمة الجيل الذهبي للأهلي، بتتكلم على القطعة الخالدة في متحف جوزيه الذهبي، بتتكلم على قرين كل اللون الأحمر في الملعب، بتتكلم على ظل تريكة وبركات ومتعب وشوقي وبو جلبان والشاطر وفتحي وجيلبرتو ومعوض

بتتكلم على سد عالي بيحجب رؤية جمعة وشادي وأحمد السيد والحضري وأمير وإكرامي، بتتكلم على اللاعب الأهم في تشكيلة جوزية، كان بيحط عليه باقي ال١١، يتبدل من يتبدل وهو الثابت الراسخ الذي لا يمكن الاستغناء عنه

مر عليه وفات عشرات الإرتكازات ما بين حسن مصطفى وأكوتي وشوقي وغالي وبوجلبان وإينو وغيرهم ومحدش قدر يقعده أو يقلل دوره بل كانوا بيتبدلوا عليه وهو ثابت أي ثنائية

في أي محاضرة فنية قبل أي مباراة كان جوزيه بيخصصله فقرة لوحده عن دوره في الملعب لإنه أهم لاعب في الملعب، جوزيه كان بيقول عاشور بيحسسني ان الكورة سهلة جدا وان أنا العجوز أقدر ألبس شورت وألعبها، كان عبقري في امتصاص الكرة ولو جياله مدفع هيمتصها ويوقفها بمنتهى اليسر

لو زنقته وسط ٤ هيقدر يحافظ على كورته ويعمل دورانه ويفتح ملعب، الباسينج جيم أتعمل عشانه، مفيش مباراة خرج منها إلا وهو تقريبا الأكثر استلاما وتسليما، الهجمة كانت بتعدي عليه أكتر لاعب، موقع وباصم على كل محاولة، عاشور كان الضمانة ان الكرة هتفضل معاك ولو عايز تلعب ٣١ كمان

كان بيتشاور عليه عشان يقتل نجم كل منافس، تعالى يا عاشور نسي شيكابالا الكورة اللي هو ناسيها أساسا، تعالى يا عاشور حط النفطي في جيبك، تعالى يا عاشور عمر جمال ميعديش، تعالى يا عاشور السعيد ميلمسهاش، تعالى يا عاشور المساكني منسمعش اسمه، تعالى يا عاشور علم على السوبر هيرو لكل منافس

كان يلعب على نجم بيسحر مش بس بيلعب وعنده كل السرعات والمهارات ومع ذلك عاشور بكل سهولة يخليه يخلص المباراة بدون ما يعرق حتى، ومكنش بيتفوق على نجم في مرة صدفة، دي أتكررت ثنائياته مع نجوم القارة مرات ومرات ومفيش مرة حد قدر يتفوق عليه

عشان كده لو بتسأل عن سر إنجازات ٢٠٠٥ شاور عليه أول واحد وده بشهادة جوزيه نفسه مدرب هذا الجيل، وهو اللي كان سبب مباشر أن كل لاعب في الملعب يظهر بالشكل ده لان في ظهره وإلى جواره حسام عاشور

ومكنش غريب أن جميع هزائم الأهلي القارية من ٢٠٠٥ ل٢٠١٣ مكنش فيها عاشور إلا مرة أو ٢، وده أثبت أن عدم وجوده في الملعب يعني هلاك لكل من حوله، وده ترجم أرقامه اللي تخطت ال٥٠٠ مباراة ، وأكثر لاعب شارك في تاريخ الأهلي محليا وقاريا وكسر كل الأرقام

عاشور يستحق التجديد ولموسمين عشان يوصل لرقم حسام حسن ويصبح الأكثر تتويجا بالدوري، ويتخطى ألفيس ويصبح أكثر لاعب تتويجا بالبطولات في التاريخ على مستوى العالم، وده إنجاز لينا قبله لأن جميع ألقابه بتيشرت واحد وهو الذي لم يرتدي غيره طوال مسيرته الأسطورية

كل عام وانت ملامس الذهب يا قطب الكرة المصرية والافريقية الثاني