حكايه مدخن تبدأ بسعاده وتنتهى بكارثه

مشهد

من المناظر المؤذيه فعلا واحد فى اسانسير محشور فيه عشره ويطلع سيجاره ويدخنها فى برود شديد وينفخ الدخان فى عيون الى حواليه يمين وشمال . او واحد بيدخن فى عربيه صغيره شبابكها مقفوله زى علبه البلوبيف بدون اى مراعاه لاسرى الزنزانه الى حواليه ، احنا يا جماعه عايشين فى عصر التلوث وفى مداخن حوالينا بما فيه  الكفايه ، السم بقى فى الهوى والشرب والأكل بكميات كافيه قوى . فى اوروبا السجاير بقت خلاص  ممنوعه فى الاتوبيس فى الترولى فى السينما فى المسرح فى المكتب فى المستشفى فى كل غرفه مقفوله او مكان مقفول بنلاقى اليافته smoking forbidden  ممنوع التدخين 

 افكار المدخن

 مره سألت مدخن انت بتدخن ليه ؟ قالى من الغيظ هتفرس -هطق- هجن وعمال يكز على سنانه ويعفر !!!!؟ ..قولتلوا  طب مانت اهو بتدخن وهطق برده وبرده هتجن  راح قايلى بس  على الاقل بنفخ بفضفض بنفس بحرق اى حاجه عايز احرق اى حاجه . (هيستريا )التدخين رمز للهيستريا العصريه . الناس بتاكل طول الوقت لب سودانى حمص كرامله شوكلاته بطاطا عماله نندغ باستمرار وتدخن على طول وتزعق وتصرخ وتشوح بايديهاوتتخناق على اقل سبب وباليل يبلعوا  شويه حبوب منومه عشان يناموا شئ مش طبيعى مرستان حياه مفتعله حياه معلبه قطعا الناس دول مش عايشن . كل واحد مقفول على نفسه  ،متربس عليه بابه ،مش عايز يفتح لحد. انانيه مطلقه وفرضيه وعزله داخليه واوهام ووساوس وقلق وانتحار بطئ . كان نفسى اقوله ليه ليه تعمل فنفسك كده . الحياه قدامك وكلها حجات جميله قاعده حلوه على النيل فى النسمه الجميله مع اهل الموده- مزيكا- كتاب، لقمه حلوه مع اولادك وانت بتقول الله اكبر. اكبر من كل التفاهات الى انت عايش فيها والى انا عايش فيها والى احنا عايشين فيها. المتع  البريئه متاحه وموجوده فى اى لحظه واحسن الف مره من اللذات الغليظه المهلكه والاستنزاف الممرض . كان نفسى اقوله قوم اتحرك اعمل اى حاجه قدم خدمه لاى حد انجد مسكين خد ايد واحد اعمى وعدى بيه الشارع ، روح قسم المجاريح فى اى مستشفى وقدملهم بونبون ازرع شجره اعمل اى شئ مفيد لو نزلت للناس التعبانين قلقك هيغرق فقلقهم وعذابك هيغرق فى عذابهم السيجاره مش هتحل مشاكلك لكنها هتدمر الجدار الباقى الى انت محتمى فيه (جسمك) وهتملى جسمك وصدرك هباب مفيش حته بيمر فيها الدخان الا ويضرها بدأً من الشفتين والقصبه الهوائيه والرئتين وتصبح الصبح تطلع كل ده بلغم تقعد تكح وتطلعه ، ده غير اضطراب الهضم بسبب اختلال افراز الحامض فى المعده غير تصلب الشرايين والجلطه والزبحه والكسل الكبدى والغددى . ليه ده كله هو انت عايز تموت طب يا اخى ما تموت موته حلوه موته كريمه كده تبرع بدمك للمنكوبيين يبقى اسمه موت بكرامه كده وليه معنى ، خفت اقوله يمكن يشتمنى يقولى انت مالك يا اخى واحد عايز يموت انا حر فى رزقى ففلوسى فصحتى. ابدأ والله انت مش حر ابدا ده انت عبد لسيجاره بجنيه ،عبد للتعود ،عبد للوهم. عنف ملكات الحريه هى قتل الحريه حريه قتل النفس هى اعدام لكل حريه ونفى لكل حريه ، انت عايز تدخن دخن لكن متعملهاش فلسفه .الانسان مجنون دجال مزور والتدخين والمخدرات والخمور هو عرض هذه الامور . تعالوا نشوفوا قصه هذا الجنون اذاى بيبتدى وازاى بينتهى

البدايه

فى العاده بتكون البدايه قاعده صحاب ماتيجى نخمس انت مش عايز تدخن ليه؟ انت مش راجل؟ انت بتكح ! طلع الدخان من مراخيلك  ولا انت عيل صغير . بيبتدى الموضوع هزار وتقضيه وقت وضحك ومحاوله الاطفال تقليد الكبار وتنتهى الحكايه بعد خمسين سنه لنفس هذا الولد هو راقد فالمستشفى حاله انتفاخ فى الرئه نتيجه نزلات ربويه وشعببيه مستمره ، الرئه فقدت المرونه ومش قادر ياخد شهيق ولا زفير وكميه الهوا الى يقدر ياخدها قليله جداً وينتهى بيه المطاف وهو بيستعمل جهاز اوكسيجين ويبتدى العد التنازلى لحياته .

قصه التدخين

قصه التدخين ابتدت بنزول كولمبوس واكتشافه لامريكا وخدوا التدخين من الهنود الحمر وانتقل التدخين بالطريقه دى لاسبانيا ومن اسبانيا لاوربا ومن اوربا للقارات الخامسه وبعدين اصبح شيئ للوجاه وللطبقه الارستقراطيه وفى الحرب العالميه اصبح متعه الجندى هو علبه السجاير الى بعتهالوا خطيبته وبعد كده ابتدت الاعلانات تتفننن فى جذب الناس الى السجاير ودايما السجاير بتتحط فى الاعلانات المرتبطه فى لحظه حب لحظه صداقه لحظه ضحك اكله حلوه ، وممثلات والى بيحبهم الجماهير دايماً بيتصوروا وهما بيدخنوا كمان الافلام اتفننت فى الموضوع ده دايما الزعماء فى الافلام تلاقيهم بيدخنوا  واصبحت السيجاره رمز للجدعنه ، لغايه ما جيه المؤتمر الاخير فى السرطان ووقف رئيس المؤتمر ليعلن ان جميع الاطباء ان السجاير احد اسباب السرطان المؤكده وان احصائيات السرطان بين المدخنين اعلى بكتير من احصائياته بين غير المدخنين ولكن بعد العاده ما انتشرت .

ماذا حدث بعد مؤتمر السرطان 

بعد مؤتمر السرطان  الحقيقه الموضوع مختلفش كتير حتى بعد طباعه صور الامراض التى تؤدى اليها التدخين على علب السجائر  وظهرلنا ناس زى الدجالين بتوع الموالد يقفوا ويقولوا ان فى اختراع عظيم ممكن لو استخدمته ميحصلش اى سرطان ولا اى بتاع وعندنا الدورق ده. دخان السجاير يمشى فيه ويعقم وياخد كل القطران بس الى يشترى . حتى الشركات ابتدت فيما بينها تتنافس مع بعضها فى موضوع الفلتر لكن ده كل كلام فارغ دخول القطران ولو بنسبه ضئيله كفيل بتهيج الاغشيه .

اضرار التدخين

السجاير من مكوناتها القطران ومع التدخين القطران ده  بيطلع ويدخل الرئتين ودى مواد مهيجه للاغشيه .زى ما قولنا الدخان فى كل سكه بيعمل التهابات بدأً بمررات التنفسيه والهضميه وتهييج الاغشيه واضطرابات الهضميه والتنفسيه من الشفتين واللسان والحنجره والقصبه الهوائيه والشعب والرئتين بيحصل تدمير وترسيب للقطران الى قولنا عليه وحكايه الفلتر ومش الفلتر ده بيحمى بنسبه ضئيله خالص من القطران .التهيج فالاغشيه نتيجه سنه بعد سنه يبدأيحصل تحول سرطانى فى الخلايا المبطنه للغشاء .وبمجرد ما تظهر خليه سرطانيه واحده يبدأ مرحله الغزو وبسرعه يمشى فالدم ويوصل للمخ والعظم . مش لازم نهايه المدخن تكون سرطان ممكن المسأله تنتهى نهايه اخرى زى ما قولنا جلطه او زبحه لدرجه انها رفعت نسبه الموت بالجلطه للشباب الى عمرهم حوالى 30 سنه فقط . والوهم الشائع من ان القلق والهموم ممكن يتبخر مع اول سيجاره ده طبعاً كلام فارغ ولكن هذا الوهم الشائع لسه موجود حتى  بين المثقفين وبالتعود يتهيألوا ان مشاكله بتتحل ، والسيجاره ورا السيجاره والاكل ورا الاكل وتلاقى اعصابه خرمانه زى المليم المصدى وفى لحظه كل ده ينتهى اسعاف- مستشفى- غرفه الانعاش -الممرضه تطلب الدكتور حالاً- القلب ابنتدى فى النزع الاخير -الدكتور جاى يجرى بعد فوات الاوان . 

الانسان اساء استعمال جسمه فيجي فلحظه الجسم بيحتج على هذه الاساءه على سوء المعامله والقلب يرفض يدق وتنتهى الحياه . انا عارف ان صاحبنا مدمن التدخين ممكن يشوف الكلام  ده وبرده يولع سيجاره ويدخن عشان يمخمخ ويمعنن الكلام على رأى اهل المزاج طبعاً يعنى مصيره يفتكر كل معنى وكل حرف من الكلام .

"دكتور مصطفى محمود"