نصائح ميكاب لطريقة استعمال الكونسيلر
💚نصايح فى اختيار الكونسيلر المناسب:
يعتبر الكونسيلر من اساسيات المكياج اللى مفيش بنت بتستغنى عنه لانه بيساعد على عيوب الوش, اخفاء الهالات السوداء اللى تحت العين, البقع أو الحبوب و بيحسن من مظهرنا . فى نصايح و اساسيات لازم تكون البنات عارفاها فى استخدام الكونسيلر و ازاى نختار اللون و النوع المناسب لينا جبتهالكم انهاردة تعالوا نشوفها.
💙اسباب الهالات السوداء:
1 – نتيجة للارهاق و سوء التغذية و التدخين.
2 – نتيجة لطبيعة الجسم و دى حالة جلدية بيكون فيها الميلانين او صبغة اللون فى جلدنا زيادة شوية عن الطبيعى.
3 – الدورة الدموية غير منتظمة و بتسبب مش بس هالات كمان انتفاخات تحت العين.
_ازاى نختار لون الكونسيلر و نوعه:
كريم الاساس دايما بنختاره زى لون بشرتنا بالظبط بس مش هنعمل كده مع الكونسيلر لانه لازم يكون درجة او درجتين افتح من لون الجلد زى الصورة .
✋✋فى الوان للكونسيلر تانية :
في ألوان مختلفة للكونسيلر غير اللون البيج ال natural اللي بيبقي قريب من لون الجلد, طيب إزاي أعرف الألوان التانية وافرق إزاي في استعملاتهم؟ شوفي تحت خريطة ألوان الكونسيلر, كل لون بنختاره بيبقي بيعادل مشكلة في لون بشرتنا وبيبقي عكسها .. تعالوا نشوف بالتفصيل:
1 – الكونسيلر الاصفر: بيوحد لون البشرة بشكل عام ينفع للهالات تحت العين وبيدينا ضى و حياة للجلد المرهق او الباهت لونه و بيعيدله الحيوية.
2- الكونسيلر البينك أو الخوخي أو البرتقالي: بيدي شكل طبيعي للأماكن الغامقة علي الوش وبيشيل السواد تحت العين و الزرقان و العروق وزي ماشايفين في الخريطة هو بيعدل الألوان الزرقة اللي غالبا بيبقي لون هالات تحت العين.
3 – الكونسيلر الاخضر: بيخفي المناطق الحمرا على الوش زي أثر الحبوب والبقع الحمرا وكمان ده افضل لتغطية حب الشباب، مش بنستعمله على الأجزاء الغامقة في الوش زي الهالات السودا مثلا وباين في الخريطة تحت انه بيعادل اللون الاحمر.
4- الكونسيلر الموف: بيوحد لون البشرة خصوصا لو لونها اصفر أو بهتان.. وده لون مش منتشر قوي من ألوان الكونسيلر.
💋💋اختارى الكونسيلر المناسب لبشرتك:
1 – الجلد الحساس الرقيق بنستخدم معاه الكونسيلر اللى من مكوناته المرطب و يكون كريمى و فيه فيتامينات😍
2 – الجلد اللى فيه مسام واسعة او بشرة مختلطة احسن نوع بينفع معاه هو الكونسيلر الستيك
3 – الجلد الدهنى بينفع معاه الكونسيلر السائل اللى من مكوناته المعادن
😮ملحوظة :
فساعات هتحسى ان بشرتك محتاجة انواع مختلفة من الكونسيلر لاختلاف فصول السنة لان فى ناس جلدها بينشف اوى فى الشتاء فبتحتاج النوع اللى فيه مرطبات كثير الكريمى و فى الصيف فى ناس جلدها بيمتص الالوان جامد فبتحتاج لون اغمق من النوع اللى بتستعمله فى العادى.
💥طريقة استعمال الكونسيلر الصحيحة:
1 – وضع الكونسيلر : قبل وضع الكونسيلر يفضل لو نكون استعملنا كريم مرطب و بريمر عشان نهييء البشرة.
الطريقة الاولى : هتحطى نقط صغيرة فى شكل دواير تحت عنيكى واستخدمى سفنجة المكياج او البيوتى بلندر او اصابعك انك تضغطى على الدوائر لحد ما اللون يمتزج ببشرتك, نصايح كتير دلوقتي بتقول إن الطريقة ديه مش بتخفي الهالات بشكل فعال وانه الطريقة رقم 2 هي الصح.
الطريقة التانية : ارسمى بالكونسيلر باستخدام فرشاة مثلث تحت عنيكى عشان يزود كمان اضائة وشك و برده امزجيه بطريقة الضغط
ملحوظة : بلاش نستخدم ايدينا فى مسح الكونسيلر كأن بنحط كريم و بلاش نفرك تحت عنينا لان ده بيزود من حساسية الجلد و غمقانه
2 – البودرة
هنستخدم كمية بودرة بسيطة بالفرشاة و نمسح برقة جدا تحت عنينا فوق الكونسيلر عشان يثبت و لونه ميروحش
بنصحك انك لازم ترطبى وشك كويس قبل استعمال الكونسيلر عشان ميعملش خطوط تحت عنيكى و شكل المكياج يبوظ.
