إضطراب ما بعد الصدمة أسبابه وعلاجه التخلص من المشاعر السلبية
في هذا المقال سوف احدثكم عن تأثير ما بعد الصدمة سواءا كانت هذه الصدمة نفسية او جسدية وكيفيه التخلص من هذه المشاعر السلبية.
مهم تعرفو اضطراب اسمه PTSD "Post traumatic stress disorder " ،أو تأثير مابعد الصدمة .
الصدمة دي ممكن تكون زلزال، حادثة ، اعتداء جسدي أو الأشهر موت شخص عزيز عليك .
تخيلوا كدا إن حياتنا عامله زي كوباية ميه فاترة والأحداث الي بنمر بيها زي اللبن البودره بتدوب ف المية وتغيرها من مية للبن زي مثلا الجواز ، حياتك قبله مش زي حياتك بعده بس انت مستوعبة دا والدنيا ماشية .
والأحداث السخنة شوية ، بتسخن المية دي وبالتالي لما تدوبي فيها معلقة لبن بودره " الحدث الصادم هنا " مش حتدوب وحتكلكع .
الكلكعة دي الي هي عدم قدرتك علي هضم وذوبان الصدمة ف حياتك ليها شوية أعراض كآتي :
1-Flashback & nightmares .
دا العرض الأساسي إنك تفضل تختبر الصدمة دي وكأنها حصلت وبتحصل دلوقتي.
بعد وفاة شخص عزيز عليك ، حتفضل فترة تحلم بإنه مات ولسة حيموت وبيموت وتعبان ، دا مالوش تفسير محدد بس احدي تفسيراته إن دا جزء من استيعابك للموقف ، الاوعي او العقل الباطن بيحاول يستوعب رحيله لأن الطبيعي بتاعنا إننا بنسبة كبيرة بنستعيد الأحداث الي مرينا بيها أو الي عايزين نمر بيها ف احلامنا .
الflashback بقي هي انك بتحلم وإنت صاحي تتحط ف نفس الموقف وتستعيد كل حاجة كأنها لسة بتحصل دلوقتي.
زي مثلا لو حد رجع من حرب ، لو سمع صوت طيارة حتلاقيه طلع يجري يستخبي تحت السرير وكأنه ف أرض المعركة بالظبط .
دي تفسيرها، كأن الحدث الي اتحطيت فيه دا ظهر معلقة زنقت بيها كلكيعة اللبن علي جدار الكوبايه كدة ساعتها هتلاقي لبن بودره سليم زي ماهو طلع من الكلكيعة دي ، فتعيد نفس الموقف تاني .
ودا شئ كويس ، دا حيساعد علي تفتت الكلكيعه دي ودوبانها .
2-سهولة الاستثارة.
بعد التعرض لأي موقف صادم، حيبقي ال threshold بتاع الاستثارة أقل، فيبقي حساس ويزعل ويتأثر من اقل حاجة ،الخوف من الحاجات العادية احيانا رغم انه مكنش بيخاف منها قبل كدة زي الضلمة مثلا ، القلق طبعا الي ممكن يدخله ف امراض نفسية زي الإكتئاب أو أمراض نفس جسمية زي ألم غير معروفله سبب ف اي منطقة من جسمه .
والارق نتيجة لي فات وميعرفش ينام كويس وخايف ينام اصلا من الكوابيس كمان .
3-Numbness.
ساعات بقي بيحصل عكس رقم 2يجيله تبلد وميبقاش حاسس بحاجة . عارفين لما شدة تيار الكهربا تزيد فتحصل قفلة ولوحة المفاتيح كلها تفصل ، دا بالظبط الي بيحصل.
ودا الي بيفسر ليه ساعات لما تروح تعزي حد تلاقيه مبيعيطش وتقولو ربنا مصبره ، وف علم النفس هو فاصل من شدة الموقف عليه . واحيانا التبلد مش بس بيصيب المشاعر دا كمان بيمتدد لجسمه ف تلاقيه مش قادر يحرك رجله أو ايده ويحس انهم منملين كدة .
4-تغير المعتقدات .
احيانا بعد التعرض لصدمة الشخص يتكون عنده معتقد خاطئ وممكن يفضل معاه طول عمره زي مثلا لو طفل كلب عضه يفضل طول عمره معتقد ان كل الكلاب شرسة ويتقفل منهم خلاص.
او شخص يجيله أي ابتلاء فيعتقد انه شخص وحش او ان كل الناس وحشة أو ان ربنا مش رحيم وهكذا.
طب إزاي نتجنب الكلام دا؟
• اهم حاجة ال social support &talking therapy الي بيتعرض لصدمة قدامك لازم تكونوا جمبه علي اد ما تقدرو ولما تروحو تعزوا حد وتلاقوه مش بيعيط انكشوه لحد ما يعيط ومتصالحمش وسبوهم يعيطوا، غلط جدا تسكتوهم زي ما بتعملوا.
والناس الكتومة بالذات لازم تدوهم فرصة يحكوا بمشاعر يحكو ويتكلمو لحد ما سلك تذكر الحدث والشعور بيه يلمسو ويعيط ، دا بيساعد الكلكيعة دي انها تتفك وتدوب لحد ما.
وطبعا تتكلمو ف بيئة صحية من غير خوف ، من غير ما حد يلوم حد او يوبخه أو يحكم عليه ... الخطيئة عمرها ما كانت شعور انت حاسس بيه ، الخطيئة فعل .
وزمان كان في العزا بيبقي ف واحدة اسمها المعددة دي علماء النفس بيعتبروها طبيبة نفسية لأنها كانت بتخليهم يعيطوا كلهم وبالتالي يخف تأثير ما بعد الصدمة . طبعا من غير صويت وتعديد عشان دا حرام .
•لو انت الي اتعرضتي لصدمة ، حاولي تطلعي كل الي جواكي بالعياط بالكتابة بالرسم بإنك تحكي وتعيطي ودا أفضلهم .والاستعانة بالله ف الأول والآخر طبعا.
• الموضوع دا طبيعي يحصل لمدة شهر وفي مقالات قريتها بتقول تلات شهور وفي مقال بيقول لحد سنة فأنا معرفش بالظبط المفروض لو زاد عن مدة قد ايه يبقي ساعتها لازم تتعرض علي دكتور نفسي .
•وطبعا الأهم من دا كله اليقين بقضاء الله وقدره وإن الدنيا دار ابتلاء ، وإنه شئنا أم أبينا الصدمات والإبتلاءات جاية جاية ، فنحمد ربنا ونجمد كدة عشان لسة... وربنا يرزقنا الثبات والصبر والرضا علي ما يريد .
