قصيدة عربون محبة الشاعر محمد الليثي
عربون محبه
(أول رساله مني إليها )
" إلى من جعلت قلمي يهمس في أذن الورقة بأنني أحب "
شد الخيم واحفر طريق قلبك
سمّر وغني وقول إن الحياه حلوه
بص ف مرايتك قول أنا بحبك
مش هخسر الدنيا عشان جوله
ربط عروق الدم وصلها بعيونها
جاور طفولتك لو حتى بتهاجر
إزاي تعيش الدنيا من دونها
وازاي هتصبح ف الأخير شاعر
حرك صحابك زي ما تريد ف الأغاني
خليك مسامر لها مش حد تاني
وارفع بصوتك مهما بيروح أو يغيب
بص ف عيونها وقولها إنت النصيب
وإن كانت الدنيا هتسيب الايدين
فأنا مش هسيب
رص البنات قدامها من غير العدد
قولها :
روحك ياحضره حاضره فيا ب 100 مقام
نفسي اطوفك بس خايف م الحسد
نفسي أشوفك والمسك
واطوف وأقول لله مدد
يا أول بنت ف الدنيا
أشوفها بتقش الولد
وأول حضره تسكن فيا ب 100مقام
نفسي ونفسي ... ونفسي
بس مش لاقي الكلام
فيه ف روحي رصاصه حيه
ماشيه بتموت عيوبي
لو أطول النظرة منك
أملك الدنيا ف جيوبي
لو أطول اللمسه " آاااه "
عمر شاعر ساب كتير أحزان وراه
واما كنت ف يوم معاه
فجأة تحلو الحياه وتكون بخير
تصبح الدنيا غلابه وتصبح الأرواح دوا
أمتى بس نكون سوا
تطيبي قلبي الجريح
وتشيلي مني 1000عله
يااجمل بنات الحي كله يا سندريلا
اقلع التوب الجنايني
واعزم الناس اللي مني
واما بعيونك تهلي
أكون أمير
واما تمشي تسيبي روحك مش حذاءك
ابعتها ليكي ف ظرف مقفول بالصوابع
فيه رساله : ضمي روحك واقرئي
" يا أميرة قلبي أنت ومحتوى فكري اللي تاه
روحي شارده ف طيف عيونك
نفسي طيفي يكون معاه
قلبي مات 20 سنه
وأنت الحياه فسبيه يعيش
عيني مقبرة البنات
لما شافت نور عيونك
فجأة تتحول نجاة
هو أنت إيه
هو أنت مين
طفل مابيكبر ف عينك
مهما بتمر السنين
فمين تكون الأم للطفل المشاغب
مين تكون الفرحه لعيونه الغزالي
مين تلومه ومين تعاتب
مين تقوله إن أنت غالي
طوبه للحب اللي منك
موت الحزن اللي جالي "
يامعيشه وستر خيشة
بس من ريحة حوريه
لسه روحك زي ريشه
طايره بتزغلل عنيه
لسه عينك روح سحاب
ماشيه بتضلل عليا
لسه بعد الشعر دا
سايبه روح متقيده
أحلام كتير متهدده
تتبني ع كلمة منك
لو تحسي باللي فيه
يامعيشه وستر خيشة
بس من ريحة حوريه
لسه روحك زي ريشه
طايره بتزغلل عنيه
4 سنين م الشعر علشان أكتبك
أول قصيدة ع الملأ من غير ما أخاف
أصبحت كل ما أخاف أموت
أصبحت كل ما أموت أعيش
أصبحت كل ما اعيش أحبك
وأخاف الدنيا تاخدني منك
وعشان كدا بطلت أخاف
وكتبت للعالم بحبك
يافرحه ردت فيا روحي
بعد اما كانت معزوله
وهزت في الضلوع قلبي
فيرقص رقصته الأولى
اغنيلك ٠٠ طب أحكيلك
هشيلك وأنت بتخطي عتب بيتنا
لحد ما اخطي باب موتي
وههمس للجميع صمتا
بأنك بس من صوتي
محدش يسمعك غيري
يا أول نعمه فرديه
وربي خالقها ع قدي
إذا تشيبي
عكازك من قفصي الصدري
إذا تحني
ف حضني حن من بدري
وقلبي مسامح الغلطة
إلى ما تعرفي تعدي
تكوني معايا يا حبيبتي
ف قصر محاوطه سور قلبي
يا أول نعمه فرديه
وربي خالقها ع قدي
نخلف بنت تشبهلك
وتشبه طولك السالب
بحبك ربنا الغالب
هقولها بس ف خناقنا
ونتصالح بظرف قديم
وروح فينا
بتعمل ف الحرى ضله
تقولي مهما نتصالح
دواك مش شافي للعله
فبضحك تبتسم روحك
تقولي ياه سلام قلبك
مثبت ف الوريد مله
اغازل ف الهوا عيونك
واقولك
يااجمل بنات الحي كله يا سندريلا
وارفع بصوتي مهما بيروح أو يغيب
وابص ف عيونك وأقولك أنت النصيب
فحرام لو بعد الحب دا
كل الطرق متمهده
والدنيا تتمسك كدا
وإحنا نسيب
محمد الليثي
